Tuesday, November 11, 2014

ಕಪ್ಪುಹಣದ ಸತ್ಯ-ಮಿಥ್ಯೆ




-ಡಾ. ಅಶೋಕ್ ಕೆ. ಆರ್

ಕಪ್ಪುಹಣದ ಸತ್ಯ-ಮಿಥ್ಯೆ



ಕಳೆದ ಬಾರಿಯ ಚುನಾವಣೆಯಲ್ಲಿ ಎನ್.ಡಿ.ಎ.ಯ ನೇತೃತ್ವ ವಹಿಸಿದ್ದ ನರೇಂದ್ರ ಮೋದಿಯವರು ಪದೇ ಪದೇ ತಮ್ಮ ಭಾಷಣದಲ್ಲಿ ಪ್ರಸ್ತಾಪಿಸುತ್ತಿದ್ದುದು ಪರರಾಷ್ಟ್ರಗಳಲ್ಲಿರುವ - ಹೆಚ್ಚಿನದಾಗಿ ಸ್ವಿಸ್ ಬ್ಯಾಂಕುಗಳಲ್ಲಿರುವ ‘ಕಪ್ಪುಹಣ’ವನ್ನು ಭಾರತಕ್ಕೆ ನೂರೇ ದಿನಗಳಲ್ಲಿ ವಾಪಸ್ಸು ತರುವ ಬಗ್ಗೆ. ನೂರು ದಿನಗಳಲ್ಲಿ ಅಷ್ಟೂ ಹಣವನ್ನು ವಾಪಸ್ಸು ತಂದು ಭಾರತದ ಏಳ್ಗೆಗೆ ಕಾಣ್ಕೆ ನೀಡುವುದಾಗಿ ಘೋಷಿಸಿಕೊಂಡಿದ್ದರು. ಉಳಿದ ಅನೇಕ ಕಾರಣಗಳಿಂದ ಮತ್ತು ತಮ್ಮ ವೈಯಕ್ತಿಕ ಪ್ರಭಾವದಿಂದ ಬಿಜೆಪಿ ಏಕಪಕ್ಷವಾಗಿ ಸರಕಾರ ನಡೆಸುವಷ್ಟು ಸ್ಥಾನಗಳನ್ನು ಪಡೆಯಲು ಸಾಧ್ಯವಾಯಿತು. ನಿರೀಕ್ಷೆಯಂತೆ ನೂರು ದಿನಗಳೊಳಗೆ ಕಪ್ಪು ಹಣವೆಲ್ಲ ವಾಪಸ್ಸು ಬಂತೇ? ಕಪ್ಪುಹಣದ ಬಗೆಗಿನ ತನಿಖೆಯ ಸಲುವಾಗಿ ವಿಶೇಷ ಪಡೆಯೊಂದನ್ನು ರಚಿಸಿದ್ದು ಬಿಟ್ಟರೆ (ಈ ರಚನೆಯ ಹಿಂದೆ ಕೂಡ ಕೋರ್ಟಿನ ನಿರ್ದೇಶನವಿದೆ. ಕಪ್ಪುಹಣದ ತನಿಖೆಯ ಸಂಬಂಧ ವಿಶೇಷ ಪಡೆಯನ್ನು ಇಂತಹ ದಿನಾಂಕದೊಳಗೆ ರಚಿಸಲೇಬೇಕು ಎಂದು ಕೋರ್ಟು ಆದೇಶಿಸಿತ್ತು. ಯು.ಪಿ.ಎ ಹೇಗಿದ್ದರೂ ತನ್ನ ಆಡಳಿತ ಕೊನೆಗೊಳ್ಳುತ್ತದೆ ಎಂದು ಅದರ ಸಹವಾಸದಿಂದ ದೂರವಿತ್ತು. ಕೋರ್ಟು ಕೊಟ್ಟ ಕೊನೆಯ ದಿನಾಂಕ ಮುಗಿಯುವ ಮೊದಲೇ ವಿಶೇಷ ಪಡೆ ರಚಿಸಲೇಬೇಕಾದ ಒತ್ತಡವಿತ್ತು ಹೊಸ ಸರಕಾರಕ್ಕೆ) ಕಪ್ಪುಹಣ ತರುವುದಕ್ಕೆ ಹೆಚ್ಚಿನ ಉತ್ಸಾಹವನ್ನೇನೂ ತೋರಿಸಲಿಲ್ಲ ಹೊಸ ಸರಕಾರ. ತಮ್ಮ ಮಾತಿನ ಮೋಡಿಯ ಮಧ್ಯೆ ನರೇಂದ್ರ ಮೋದಿಯವರಿಗೂ ಕಪ್ಪುಹಣದ ವಿಚಾರ ಮರೆತುಹೋಗಿದ್ದಿರಬಹುದು. ತನ್ನ ಆಡಳಿತಾವಧಿಯುದ್ದಕ್ಕೂ ವಿದೇಶದಲ್ಲಿರುವ ಕಪ್ಪುಹಣವನ್ನು ವಾಪಸ್ಸು ತರುವ ವಿಷಯದಲ್ಲಿ ಅಗತ್ಯವಿದ್ದ ಬದ್ಧತೆ ತೋರದ ಕಾಂಗ್ರೆಸ್ಸಿಗರು ಮೋದಿ ಮತ್ತು ಬಿಜೆಪಿ ಚುನಾವಣೆಯಲ್ಲಿ ಪ್ರಣಾಳಿಕೆ ವಿಷಯವಾಗಿಸಿಕೊಂಡಿದ್ದ ಕಪ್ಪುಹಣದ ಕುರಿತಂತೆ ಸರಕಾರವನ್ನು ಟೀಕಿಸಲು ಹಿಂಜರಿಯಲಿಲ್ಲ! 

ಪಕ್ಷದ ವರ್ಚಸ್ಸು ಉಳಿಸುವ ಸಲುವಾಗಿ ಪಕ್ಷದ ಒಳಗಡೆಯೇ ಕಪ್ಪುಹಣದ ಕುರಿತಂತೆ ಸರಕಾರದ ಬಳಿ ಇರುವ ಹೆಸರುಗಳನ್ನು ಬಹಿರಂಗಪಡಿಸುವ ಒತ್ತಡ ಹೆಚ್ಚತೊಡಗಿತು. ಅರುಣ್ ಜೇಟ್ಲಿಯವರು ‘ನಾಳೆ ಗ್ಯಾರಂಟಿ ಬಿಡ್ತೀವಿ’ ‘ಇನ್ನೇನ್ ಬಿಟ್ಬಿಟ್ಟೋ ತಡೀರಿ’ ಎಂದು ಸಿನಿಮಾ ಟ್ರೈಲರ್ ತೋರಿಸುವ ರೀತಿಯಲ್ಲಿ ಹೇಳತೊಡಗಿದರು. ಆಂತರಿಕ ಒತ್ತಡ, ಜನರ ಒತ್ತಡ, ಪ್ರಣಾಳಿಕೆಯಲ್ಲಿ ಹೇಳಿದಂತೆ ನಡೆಯಲು ಪ್ರಯತ್ನಿಸುತ್ತಿದ್ದೀವಿ ಎನ್ನುವ ಕಾರಣದಿಂದ ಸರಕಾರ ಹೆಸರು ಬಹಿರಂಗಗೊಳಿಸುವ ನಿರ್ಧಾರ ತೆಗೆದುಕೊಂಡಿತು ಎಂದುಕೊಂಡಿರಾದರೆ ಖಂಡಿತ ತಪ್ಪು. ಶಾಸಕಾಂಗದ ನಿಷ್ಕ್ರಿಯತೆಗೆ ಮತ್ತೆ ನ್ಯಾಯಾಂಗವೇ ತಪರಾಕಿ ನೀಡಬೇಕಾಯಿತು. ಹಿಂದಿನ ಯು.ಪಿ.ಎ. ಸರಕಾರ ಹೆಸರು ಬಹಿರಂಗಗೊಳಿಸಲು ಸಾಧ್ಯವಿಲ್ಲ ಎಂದು ಹೇಳಿ ವಿರೋಧವನ್ನೆದುರಿಸಿತ್ತು. ಬಹಳಷ್ಟು ವಿಚಾರ - ವಿಷಯಗಳಲ್ಲಿ ಯು.ಪಿ.ಎ. ಸರಕಾರದ ಮುಂದುವರಿದ ಭಾಗದಂತೆಯೇ ಕಾಣುತ್ತಿರುವ ಎನ್.ಡಿ.ಎ. ಸರಕಾರ ಕೂಡ ಮೊದಲಿಗೆ ಹೆಸರು ಬಹಿರಂಗಗೊಳಿಸಲು ನಿರಾಕರಿಸಿತಾದರೂ ಕೋರ್ಟಿನ ಒತ್ತಡಕ್ಕೆ ಮಣಿದು ಹೆಸರುಗಳನ್ನು ಬಹಿರಂಗಪಡಿಸಿತು. ಅದರಲ್ಲಿದ್ದಿದ್ದು ಮೂವರು ಉದ್ಯಮಿಗಳ ಹೆಸರು ಮಾತ್ರ! ಡಾಬರ್ ಸಮೂಹದ ಪ್ರದೀಪ್ ಬರ್ಮನ್, ರಾಜ್‌ಕೋಟಿನ ಪಂಕಜ್ ಚಿಮನ್‌ಲಾಲ್, ಟಿಂಬ್ಲೋ ಸಂಸ್ಥೆಯ ರಾಧಾ ಟಿಂಬ್ಲೋ ಹೆಸರುಗಳನ್ನು ಸರಕಾರ ಬಹಿರಂಗಪಡಿಸಿತ್ತು. ಹೆಸರು ಬಹಿರಂಗಪಡಿಸುವಂತೆ ಕೋರ್ಟಿನ ಮೊರೆ ಹೊಕ್ಕಿದ್ದ ರಾಮ್ ಜೇಠ್ಮಲಾನಿ ‘ಇದು ಗುಡ್ಡ ಅಗೆದು ಇಲಿ ಹಿಡಿದಂತೆ’ ಎಂದ್ಹೇಳಿದ್ದು ವಾಸ್ತವವಾಗಿತ್ತು. ಮೂವರು ಉದ್ಯಮಿಗಳ ಪೈಕಿ ರಾಧಾ ಟಿಂಬ್ಲೋ ಬಿಜೆಪಿ ಮತ್ತು ಕಾಂಗ್ರೆಸ್ಸು ಪಕ್ಷಗಳೆರಡಕ್ಕೂ ಲಕ್ಷಾಂತರ ದೇಣಿಗೆ ನೀಡಿದ್ದರು! ಉಳಿದವರ ಹೆಸರುಗಳನ್ನೂ ನ್ಯಾಯಾಲಯಕ್ಕೆ ಸಲ್ಲಿಸಲೇಬೇಕು ಎಂದು ಕೋರ್ಟು ಮತ್ತೆ ತಾಕೀತು ಮಾಡಿದಾಗ ವಿಧಿ ಇಲ್ಲದೆ ತನ್ನ ಬಳಿ ಇದ್ದ 627 ಹೆಸರುಗಳನ್ನೂ ಕೋರ್ಟಿಗೆ ಸಲ್ಲಿಸಿತು. ಮೊದಲ ಮೂರು ಹೆಸರುಗಳನ್ನು ಬಹಿರಂಗಪಡಿಸಿದ್ದಕ್ಕೆ ಆಕ್ಷೇಪ ವ್ಯಕ್ತಪಡಿಸದ ನ್ಯಾಯಾಲಯ ಒಂದೇ ದಿನದಲ್ಲಿ ತನ್ನ ಅಭಿಪ್ರಾಯ ಬದಲಿಸಿ ಪಟ್ಟಿಯಲ್ಲಿದ್ದ ಇತರೆ ಹೆಸರುಗಳನ್ನು ಬಹಿರಂಗಪಡಿಸುವ ನಿರ್ಧಾರವನ್ನು ವಿಶೇಷ ತನಿಖಾ ತಂಡಕ್ಕೆ ವಹಿಸಿಬಿಟ್ಟಿತು. ಹೆಸರುಗಳನ್ನು ತಿಳಿಯಲು ಕಾತರರಾಗಿದ್ದವರೆಲ್ಲ ಒಂದಷ್ಟು ನಿರಾಸೆಯನ್ನನುಭವಿಸಿದರು. ಮುಂದಿನ ಮಾರ್ಚ್ ನೊಳಗೆ ತನಿಖೆ ಪೂರ್ಣಗೊಳಿಸಿ ವರದಿಯನ್ನು ನೀಡಬೇಕೆಂದು ನ್ಯಾಯಾಲಯ ನಿರ್ದೇಶಿಸಿದೆ.

ಸ್ವಿಸ್ ಬ್ಯಾಂಕುಗಳೆಂದರೆ ಮೊದಲಿನಿಂದಲೂ ಭಾರತೀಯರಿಗೆ ಕುತೂಹಲ. ಅಲ್ಲಿ ಅಕೌಂಟು ಪ್ರಾರಂಭಿಸಲು ಯಾವ ದಾಖಲೆಯೂ ಬೇಡವಂತೆ, ನಿಮ್ಮ ಹೆಸರೂ ಕೇಳುವುದಿಲ್ಲವಂತೆ, ದುಡ್ಡಿಟ್ಟು ಬೀಗವನ್ನೋ ಪಾಸ್‌ವರ್ಡನ್ನೋ ನಿಮ್ಮ ಕೈಗಿತ್ತು ಕಳುಹಿಸುತ್ತಾರಂತೆ, ಇಡುವ ದುಡ್ಡಿನ ಸೇಫ್ಟಿಗೆ ನಾವೇ ಹಣ ನೀಡಬೇಕಂತೆ - ಈ ರೀತಿಯ ಅಂತೆಕಂತೆಗಳು ನಾನು ಚಿಕ್ಕವನಾಗಿದ್ದಾಗಿನಿಂದಲೂ ಇದ್ದವು; ಬಹುಶಃ ಅದಕ್ಕೆ ಮುಂಚಿನಿಂದಲೂ ಇದ್ದವು. ಅವುಗಳಲ್ಲಿ ಸತ್ಯವೆಷ್ಟು ಮಿಥ್ಯವೆಷ್ಟು ಎಂಬುದನ್ನು ಅಲ್ಲಿ ದುಡ್ಡಿಟ್ಟವರೇ ಹೇಳಬೇಕು! ವಿವಿಧ ರಾಜಕಾರಣಿಗಳು (ದೇಶವನ್ನು ಹೆಚ್ಚು ಕಾಲ ಆಳಿದ್ದು ಕಾಂಗ್ರೆಸ್ಸಾದ್ದರಿಂದ ಕಾಂಗ್ರೆಸ್ಸಿನ ರಾಜಕಾರಣಿಗಳು) ಸ್ವಿಸ್ ಬ್ಯಾಂಕಿನಲ್ಲಿ ಇಟ್ಟಿರುವ ದುಡ್ಡಿನ ಬಗ್ಗೆ ಇರುವ ಕಥೆಗಳು ನೂರಾರು. ಟ್ರಿಲಿಯನ್ ಡಾಲರುಗಳ ಲೆಕ್ಕದಲ್ಲಿ ಭಾರತದ ರಾಜಕಾರಣಿಗಳು - ಉದ್ಯಮಿಗಳು ಸ್ವಿಸ್ ಬ್ಯಾಂಕಿನಲ್ಲಿ ಹಣವನ್ನಿಟ್ಟಿದ್ದಾರೆ ಎಂದು ಮಾಧ್ಯಮದಲ್ಲಿ ಹರಿದಾಡಿದ ಸುದ್ದಿಯಿಂದಾಗಿ ಕೊನೆಗೆ ಸ್ವಿಸ್ ಬ್ಯಾಂಕಿನ ಸಂಘದವರೇ ಅಷ್ಟೊಂದು ದುಡ್ಡನ್ನು ಭಾರತೀಯರು ಇಟ್ಟಿಲ್ಲ ಇಟ್ಟಿರುವುದು ಕೇವಲ ಎರಡು ಬಿಲಿಯನ್ ಡಾಲರುಗಳಷ್ಟೇ ಎಂದು ಸ್ಪಷ್ಟೀಕರಣ ನೀಡಿದರು! ಭಾರತ ಸರಕಾರ ನಡೆಸಿದ ಕೆಲವು ತನಿಖೆಗಳು ಐನೂರು ಬಿಲಿಯನ್ ಡಾಲರುಗಳಷ್ಟು ಹಣವಿದ್ದಿರಬಹುದು ಎಂದು ಕೋರ್ಟಿಗೆ ತಿಳಿಸಿದ್ದವು. ವಿದೇಶಿ ಬ್ಯಾಂಕು ಅದರಲ್ಲೂ ಸ್ವಿಸ್ ಬ್ಯಾಂಕುಗಳ ವಿಚಾರವಾಗಿ ನಮಗ್ಯಾಕೆ ಇಷ್ಟು ಆಸಕ್ತಿ? ವಿದೇಶಿ ಬ್ಯಾಂಕು ಎಂಬ ಆದರವೇ? ಅಷ್ಟೆಲ್ಲಾ ದುಡ್ಡನ್ನು ಹೇಗೆ ಸಾಗಿಸಿದರು? ಅದನ್ನು ಏನು ಮಾಡುತ್ತಾರೆ ಎಂಬ ಸಹಜ ಕುತೂಹಲವೇ? ಅಥವಾ ನಿಜವಾದ ವಾಸ್ತವದ ಅರಿವಿರದ ಕಾರಣ ಗೋಪ್ಯವಾಗಿರುವ ವಿಷಯದ ಬಗ್ಗೆ ಗಾಳಿಸುದ್ದಿ ವದಂತಿಗಳನ್ನಬ್ಬಿಸುತ್ತ ಮಾತಿನ ಚಪಲ ತೀರಿಸಿಕೊಳ್ಳುವ ಹಂಬಲವೇ?

ವಿದೇಶಿ ಬ್ಯಾಂಕುಗಳಲ್ಲಿ ಹಣವಿಟ್ಟಾಕ್ಷಣ ಅದು ಕಪ್ಪಾಗಿ ಬಿಡುವುದಿಲ್ಲ, ಹಣವಿಟ್ಟ ವ್ಯಕ್ತಿ ದೇಶದ್ರೋಹಿಯಾಗುವುದಿಲ್ಲ. ವರ್ಷಕ್ಕೆ ಇಷ್ಟೆಂಬಂತೆ ವಿದೇಶಿ ಬ್ಯಾಂಕುಗಳಲ್ಲಿ ವ್ಯವಹಾರ ನಡೆಸುವುದು ಕಾನೂನಿಗೆ ವಿರುದ್ಧವಾದುದೇನಲ್ಲ. ನಿಗದಿಪಡಿಸಿರುವ ಒಂದು ಲಕ್ಷದ ಇಪ್ಪತ್ತೈದು ಸಾವಿರ ಯು.ಎಸ್ ಡಾಲರುಗಳಿಂತ ಹೆಚ್ಚಿನ ವ್ಯವಹಾರವನ್ನು ಭಾರತೀಯನೊಬ್ಬ ನಡೆಸುವುದು ಅಪರಾಧವಾಗುತ್ತದೆ. ಮತ್ತು ದೇಶದಲ್ಲಿ ತೆರಿಗೆ ಕಟ್ಟುವುದನ್ನು ತಪ್ಪಿಸಿ ಆ ಹಣವನ್ನು ವಿದೇಶಿ ಬ್ಯಾಂಕುಗಳಲ್ಲಿ ಇಡುವುದು ಕಪ್ಪುಹಣವಾಗುತ್ತದೆ. ತನ್ನ ಬ್ಯಾಂಕಿಂಗ್ ನಿಯಮಗಳಿಂದಾಗಿ ಸ್ವಿಝರ್‌ಲ್ಯಾಂಡಿನ ಬ್ಯಾಂಕುಗಳು ಕಪ್ಪುಹಣವಿರುವವರ ಸ್ವರ್ಗವಾಗಿದೆ. ದೇಶದಿಂದ ದೇಶಕ್ಕೆ ಅನಧಿಕೃತವಾಗಿ ಕೋಟ್ಯಂತರ ರೂಪಾಯಿಗಳನ್ನು ಸಾಗಿಸುವುದು ಕಷ್ಟಕರವಾದ್ದರಿಂದ ವಿದೇಶಿ ಬ್ಯಾಂಕುಗಳಲ್ಲಿ ಹಣವಿಡಲಪೇಕ್ಷಿಸುವವರು ಹವಾಲಾ ಮಾರ್ಗವನ್ನು ಉಪಯೋಗಿಸುವ ಸಾಧ್ಯತೆ ಹೆಚ್ಚು. ಹವಾಲಾ ಮಾರ್ಗದ ಮೂಲಕ ಹಣ ರವಾನೆಯಾದಾಗ ಒಂದಷ್ಟು ಕಮಿಷನ್ ಹವಾಲಾ ಏಜೆಂಟರಿಗೆ ತಲುಪುತ್ತದೆ. ಈ ಏಜೆಂಟರಲ್ಲಿ ಭಯೋತ್ಪಾದಕರೂ ಇರಬಹುದು, ಭಾರತದ ವಿರೋಧಿಗಳೂ ಇರಬಹುದು. ಕಪ್ಪು ಹಣ ನೇರವಾಗಿ ದೇಶದ ಆರ್ಥಿಕ ಪರಿಸ್ಥಿತಿಗೆ ಪೆಟ್ಟು ಕೊಡುವುದರೊಂದಿಗೆ ಪರೋಕ್ಷವಾಗಿ ದೇಶದ ರಕ್ಷಣೆಯ ವಿಷಯದಲ್ಲೂ ಕೆಡುಕುಂಟುಮಾಡುವ ಸಾಮರ್ಥ್ಯವಿರುವಂತಹುದು. ಇಂತಹ ಕಪ್ಪು ಹಣವನ್ನು ಭಾರತಕ್ಕೆ ವಾಪಸ್ಸು ತರುತ್ತೇನೆ ಎಂದು ನರೇಂದ್ರ ಮೋದಿ ಹೇಳಿದಾಗ ಮೆಚ್ಚದೆ ಇರಲು ಸಾಧ್ಯವೇ? ಬ್ಯಾಂಕು ಮತ್ತು ಗ್ರಾಹಕನ ನಡುವೆ ನಡೆದ ವ್ಯವಹಾರ ತನಿಖೆಯ ವಿಚಾರಕ್ಕೆ ಬಂದಾಗ ಎರಡು ಸಾರ್ವಭೌಮ ದೇಶಗಳ ನಡುವಿನ ಪ್ರಶ್ನೆಯಾಗುವುದೇ ಹಣವನ್ನು ವಾಪಸ್ಸು ತರುವ ಪ್ರಯತ್ನಕ್ಕೆ ಮೊದಲ ಹಿನ್ನಡೆ. ಅನ್ಯ ದೇಶದ ತೆರಿಗೆ ಕಳ್ಳರನ್ನು ಕಂಡುಹಿಡಿಯುವ ಸಲುವಾಗಿ ತನ್ನ ದೇಶದ ಬ್ಯಾಂಕುಗಳಿಗೆ ನಿಯಮ ಸಡಿಲಿಸಿಕೊಳ್ಳಿ ಎನ್ನುವುದಕ್ಕೆ ಆ ಸಾರ್ವಭೌಮ ರಾಷ್ಟ್ರಗಳು ಒಪ್ಪುವುದು ಕಷ್ಟವಲ್ಲವೇ? ವಿವರಗಳಿಲ್ಲದೆ, ಸರಿಯಾದ ದಾಖಲೆಗಳಿಲ್ಲದೆ ನಿಮ್ಮ ದೇಶದ ಬ್ಯಾಂಕುಗಳಲ್ಲಿ ಹಣವಿಟ್ಟಿರುವವರ ಬಗ್ಗೆ ಮಾಹಿತಿ ನೀಡಿ ಎಂದು ಸ್ವಿಸ್ ಸರಕಾರಕ್ಕೆ ಇದೇ ಜೂನ್ ತಿಂಗಳಲ್ಲಿ ಅರುಣ್ ಜೇಟ್ಲಿ ಮನವಿ ಮಾಡಿದ್ದಾರೆ. ಐದೇ ತಿಂಗಳಲ್ಲಿ ಅಲ್ಲಿನ ಸರಕಾರ ಮಾಹಿತಿ ನೀಡಿ ಆ ಪಟ್ಟಿಯನ್ನು ನಮ್ಮ ಸರಕಾರ ನ್ಯಾಯಾಲಯಕ್ಕೆ ಒಪ್ಪಿಸಿದೆ ಎಂಬುದು ಖಂಡಿತ ಸತ್ಯವಲ್ಲ! ಅಲ್ಲಿನ ಸರಕಾರ ಇನ್ನೂ ಯಾವ ಮಾಹಿತಿಯನ್ನೂ ನೀಡಿಲ್ಲ. ಹಾಗಿದ್ದರೆ ಸರಕಾರ ನ್ಯಾಯಾಲಯಕ್ಕೆ ನೀಡಿದ 627 ಜನರ ಪಟ್ಟಿ ಸಿಕ್ಕಿದ್ದಾದರೂ ಹೇಗೆ?

ಆತನ ಹೆಸರು ಹಾರ್ವೆ ಫಾಲ್ಸಿಯಾನಿ. ಮೂಲತಃ ಫ್ರೆಂಚ್‌ನವ. ಸ್ವಿಝರ್ಲ್ಯಾಂಡಿನ ಜಿನೀವಾದಲ್ಲಿರುವ ಎಚ್.ಎಸ್.ಬಿ.ಸಿ. ಬ್ಯಾಂಕಿನಲ್ಲಿ ಕೆಲಸದಲ್ಲಿದ್ದಾತ. ಕೆಲಸಕ್ಕೆ ಸೇರಿಕೊಂಡ ನಂತರ ತನ್ನ ಬ್ಯಾಂಕು ಹೇಗೆ ವಿವಿಧ ದೇಶಗಳ ತೆರಿಗೆಗಳ್ಳರ ಹಣವನ್ನು ಜೋಪಾನವಾಗಿರಿಸುತ್ತಿದೆ ಎಂಬುದನ್ನು ಕಂಡುಕೊಂಡ. ಬ್ಯಾಂಕಿನ ಇತರೆ ಸಹೋದ್ಯೋಗಿಗಳಂತೆ ಅವ್ಯವಹಾರವನ್ನು ನೋಡಿದ ನಂತರ ಕಣ್ಣು ಮುಚ್ಚಿ ಕೂರದೆ ತನಗಿರುವ ಕಂಪ್ಯೂಟರ್ ಜ್ಞಾನವನ್ನುಪಯೋಗಿಸಿ ನಿಧಾನಕ್ಕೆ ಬ್ಯಾಂಕಿನ ಸರ್ವರುಗಳಿಂದ ಎಚ್.ಎಸ್.ಬಿ.ಸಿ. ಬ್ಯಾಂಕಿನ ಖಾತೆದಾರರ ವಿವರಗಳನ್ನು ಒಂದೊಂದಾಗಿ ಸಂಗ್ರಹಿಸಲಾರಂಭಿಸುತ್ತಾನೆ. ಕೊನೆಗೆ ಇಪ್ಪತ್ತನಾಲ್ಕು ಸಾವಿರ ಖಾತೆದಾರರ ವಿವರಗಳೊಂದಿಗೆ (ಒಂದು ಅಂದಾಜಿನ ಪ್ರಕಾರ ಒಂದು ಲಕ್ಷಕ್ಕೂ ಅಧಿಕ ಖಾತೆಗಳು) ಪರಾರಿಯಾಗುತ್ತಾನೆ. ಇವೆಲ್ಲವೂ ನಡೆದದ್ದು 2008 -2009ರಲ್ಲಿ. ಲೆಬನಾನಿನ ಮತ್ತೊಂದು ಬ್ಯಾಂಕಿಗೆ ಈ ರೀತಿಯ ವಿವರಗಳು ನನ್ನಲ್ಲಿವೆ, ಇಂತಿಷ್ಟು ದುಡ್ಡು ಕೊಟ್ಟರೆ ವಿವರಗಳನ್ನು ನೀಡುತ್ತೇನೆ ಎಂಬ ಆರೋಪವೂ ಹಾರ್ವೆಯ ಮೇಲಿದೆ. ಬ್ಯಾಂಕಿಗೆ ಹೋಗಿದ್ದು ನಿಜ, ಆದರೆ ಹೋಗುವಂತೆ ಮಾಡಿದ್ದು ನನ್ನನ್ನು ಅಪಹರಿಸಿದ ಇಸ್ರೇಲಿನ ಮೊಸಾದ್ ಸಂಘಟನೆ ಎನ್ನುತ್ತಾನೆ ಹಾರ್ವೆ! ಒಟ್ಟಿನಲ್ಲಿ ಒಂದು ಹಾಲಿವುಡ್ ಚಿತ್ರಗಳಲ್ಲಿ ತೋರಿಸುವುದೆಲ್ಲವೂ ಹಾರ್ವೆಯ ಜೀವನಗಾಥೆಯಲ್ಲಿದೆ! ಬಂಧಿತನಾಗುತ್ತಾನೆ, ಬಿಡುಗಡೆಗೊಳ್ಳುತ್ತಾನೆ. ವಿವಿಧ ದೇಶಗಳ ಸರಕಾರಗಳನ್ನು ಸಂಪರ್ಕಿಸುತ್ತಾನೆ, ಉಪಯೋಗವಾಗುವುದಿಲ್ಲ. ಕೊನೆಗೆ ತವರು ಫ್ರಾನ್ಸ್ ದೇಶದವರೇ ಅವನ ಮಾಹಿತಿಯನ್ನು ದೇಶದ ಕಪ್ಪುಹಣವನ್ನು ವಾಪಸ್ಸು ತರಲು, ತೆರಿಗೆಗಳ್ಳರನ್ನು

ಹಿಡಿಯಲು ಬಳಸಿಕೊಳ್ಳುವುದಾಗಿ ತಿಳಿಸಿದಾಗ ವಿವಿಧ ದೇಶಗಳ ಮಧ್ಯೆ ಅಲೆಮಾರಿಯಂತೆ ತಿರುಗುತ್ತಿದ್ದ ಹಾರ್ವೆಯ ಬದುಕು ಒಂದಷ್ಟು ಸ್ಥಿರವಾಗುತ್ತದೆ. ಸ್ವಿಝರ್ಲ್ಯಾಂಡ್ ಮತ್ತು ಫ್ರಾನ್ಸ್ ದೇಶದ ನಡುವೆ ಕೆಲಕಾಲ ರಾಜತಾಂತ್ರಿಕ ಬಿಕ್ಕಟ್ಟು ಎದುರಾಗುತ್ತದೆ. ಫ್ರಾನ್ಸಿಗೆ ಸಿಕ್ಕ ಪಟ್ಟಿಯಲ್ಲಿ ಅವರದೇ ತೆರಿಗೆಗಳ್ಳರ ಕಳ್ಳ ಖಾತೆಯ ವಿವರಗಳ ಜೊತೆಜೊತೆಗೆ ಇನ್ನಿತರ ಅನೇಕ ದೇಶಗಳ ತೆರಿಗೆಗಳ್ಳರ ವಿವರಗಳೂ ಲಭ್ಯವಾಗುತ್ತದೆ. ಆ ಪಟ್ಟಿಯಲ್ಲಿ ಭಾರತದವರ ವಿವರಗಳೂ ಇದ್ದು 2011ರಲ್ಲಿ ಭಾರತ ಸರಕಾರಕ್ಕೆ ಆ ವಿವರವನ್ನು ನೀಡುತ್ತದೆ. ಫ್ರಾನ್ಸ್ ಪೂರ್ಣ ಪಟ್ಟಿಯನ್ನು ನೀಡಿತಾ ಎಂಬುದರ ಬಗ್ಗೆ ಖಚಿತತೆಯಿಲ್ಲ. ಜೊತೆಗೆ ಕೆಲವು ವರದಿಗಳ ಪ್ರಕಾರ ಫ್ರಾನ್ಸ್ ನೀಡಿದ ಪಟ್ಟಿಯಲ್ಲಿ 800 ಹೆಸರಿತ್ತಂತೆ. ಈಗ ಸರಕಾರ ನ್ಯಾಯಾಲಯಕ್ಕೆ ನೀಡಿರುವುದು 627 ಮಾತ್ರ. ಉಳಿದವುಗಳ ಕಥೆಯೇನಂತೆ? ಮತ್ತೆ ಅಂತೆ ಕಂತೆ!

2011ರಲ್ಲೇ ಭಾರತ ಸರಕಾರಕ್ಕೆ ಜಿನೀವಾದ ಎಚ್.ಎಸ್.ಬಿ.ಸಿ. ಬ್ಯಾಂಕಿನ ಭಾರತೀಯ ಖಾತೆದಾರರ ಪಟ್ಟಿ ದೊರಕುತ್ತದೆ. ಆಗ ಆಡಳಿತದಲ್ಲಿದ್ದ ಯು.ಪಿ.ಎ ಸರಕಾರ ಉನ್ನತ ಮಟ್ಟದ ಬಿಗಿ ತನಿಖೆಗೂ ಆದೇಶಿಸುವುದಿಲ್ಲ, ಹೆಸರುಗಳನ್ನೂ ಬಹಿರಂಗಗೊಳಿಸುವುದಿಲ್ಲ. ಏನೋ ಇನ್ನೊಂದೆರಡು ವರ್ಷ ತಳ್ಳಿಬಿಡೋಣ, ಆಮೇಲೆ ಹೇಗಿದ್ದರೂ ನಾವು ಆಡಳಿತಕ್ಕೆ ಬರುವುದಿಲ್ಲವಲ್ಲ ಎಂಬ ಉಡಾಫೆಯೂ ಇತ್ತೇನೋ! ಮೂರು ವರ್ಷದ ನಂತರ ಆ ಪಟ್ಟಿ ನ್ಯಾಯಾಲಯಕ್ಕೆ ಸಲ್ಲಿಕೆಯಾಗುತ್ತದೆ. ಮೂವರ ಹೆಸರು ಮಾತ್ರ ಸದ್ಯಕ್ಕೆ ಬಹಿರಂಗವಾಗಿದೆ. ಈಗಿನ ಸರಕಾರದ ವತಿಯಿಂದ ತನಿಖಾ ತಂಡ ಕೂಡ ರಚನೆಯಾಗಿದೆ. ಪಟ್ಟಿಯಲ್ಲಿ ಹೆಸರಿದ್ದವರು ಇಟ್ಟಿದ್ದ ಕಪ್ಪುಹಣವನ್ನು ಮೂರು ವರ್ಷಗಳಿಂದ ಅಲ್ಲಿಯೇ ಇಟ್ಟಿರುವಷ್ಟು ಮೂರ್ಖರಾ? ಮೇಲಾಗಿ ಫ್ರಾನ್ಸ್ ನಮಗೆ ಹಸ್ತಾಂತರಿಸಿದ ವರದಿ ಅವರ ಕೈಸೇರಿ ಮೂರು ವರುಷವಾಗಿತ್ತು. ಹಾರ್ವೆ ಆ ಪಟ್ಟಿಯನ್ನು ಸಿದ್ಧಪಡಿಸಿ ಒಂದು ವರ್ಷದ ಮೇಲಾಗಿತ್ತು. ಎಲ್ಲವೂ ಸೇರಿ ಈಗ ಸರಕಾರ ನ್ಯಾಯಾಲಯಕ್ಕೆ ಸಲ್ಲಿಸಿರುವ ಪಟ್ಟಿ ಹೆಚ್ಚು ಕಡಿಮೆ ಏಳು ವರುಷಕ್ಕಿಂತ ಹಳೆಯದು! ಇಷ್ಟು ಹಳೆಯ ಪಟ್ಟಿಯಿಟ್ಟುಕೊಂಡು ಕಪ್ಪು ಹಣ ತರುವುದು ಸಾಧ್ಯವೇ? ವಿದೇಶದಲ್ಲಿರುವ ಕಪ್ಪುಹಣದ ಪ್ರಮಾಣದ ಬಗ್ಗೆ ಜನರಲ್ಲಿರುವ ಕಲ್ಪನೆಗಳು ಮತ್ತು ಸಮೂಹ ಸನ್ನಿಯಂತಹ ವಾತಾವರಣವನ್ನು ತಮ್ಮನುಕೂಲಕ್ಕೆ ಉಪಯೋಗಿಸುತ್ತಿದ್ದಾರಾ ನಮ್ಮ ರಾಜಕಾರಣಿಗಳು ಎಂಬ ಅನುಮಾನ ಮೂಡುವುದು ಫ್ರಾನ್ಸ್, ಸ್ಪೇನ್‌ನಂತಹ ರಾಷ್ಟ್ರಗಳು ಈ ವಿಚಾರದಲ್ಲಿ ನಡೆದುಕೊಂಡಿರುವ ರೀತಿಯನ್ನು ಅಭ್ಯಸಿಸಿದಾಗ. ಒಮ್ಮೆ ಪಟ್ಟಿ ಕೈಸೇರಿದ ನಂತರ ಮತ್ತೆ ಸ್ವಿಸ್ ಸರಕಾರದ ಬಳಿ ಕೈಚಾಚಲಿಲ್ಲ. ಆಂತರಿಕ ತನಿಖೆಯನ್ನು ಬಿಗುವಾಗಿ ನಡೆಸಿ 186 ಮಿಲಿಯನ್ ಡಾಲರ್ ವಾಪಸ್ಸು ತರಿಸಿಕೊಂಡಿರುವುದಾಗಿ ಫ್ರಾನ್ಸ್ ಹೇಳಿದರೆ, ಸ್ಪೇನ್ ಸರಕಾರ 260 ಮಿಲಿಯನ್ ಹಣವನ್ನು ಪಡೆದುಕೊಂಡಿರುವುದಾಗಿ ಹೇಳಿದೆ. ಪಟ್ಟಿ ಹಳೆಯದಾದರೂ ಆ ಪಟ್ಟಿಯ ಆಧಾರದಿಂದ ಬಿಗಿ ತನಿಖೆ ನಡೆಸಿದರೆ ಪಟ್ಟಿಯಲ್ಲಿರುವವರ ಜೊತೆಜೊತೆಗೆ ಇತರರೂ ಸಿಕ್ಕಿಬೀಳುತ್ತಾರೆ. ಆದರೆ ಭಾರತದಲ್ಲಿ ಸದ್ದು ಗದ್ದಲಗಳೇ ಹೆಚ್ಚಿದೆಯೇ ಹೊರತು ತನಿಖೆ ಬಿಗಿಯಾಗಿ ನಡೆಯಬಹುದೆಂದು ನಂಬುವುದು ಕಷ್ಟ. ಯಾವುದಕ್ಕೂ ಮುಂದಿನ ಮಾರ್ಚಿನವರೆಗೆ ಕಾಯಬೇಕು.

ಕಪ್ಪು ಹಣ, ಸ್ವಿಸ್ ಬ್ಯಾಂಕ್, ಲಕ್ಷ ಕೋಟಿ, ಕೋಟಿ ಕೋಟಿ ಎಂಬ ಉದ್ಗಾರಗಳ ನಡುವೆ ಒಂದು ಮೂಲಭೂತ ಅಂಶವನ್ನು ನಾವೆಲ್ಲರೂ ಮರೆತುಬಿಟ್ಟಿದ್ದೇವೆ. ನಮ್ಮ ದೇಶದಲ್ಲೂ ಅಪಾರ ಪ್ರಮಾಣದ ಕಪ್ಪುಹಣವಿದೆ. ಬ್ಯಾಂಕಿನ ಲಾಕರುಗಳಲ್ಲಿ, ಮನೆಯೊಳಗೆ, ಭೂಮಿ - ಚಿನ್ನದ ಖರೀದಿಯಲ್ಲಿ, ಅಪಾರ ಪ್ರಮಾಣದ ಕಪ್ಪುಹಣ ದಿನನಿತ್ಯ ಹರಿದಾಡುತ್ತಿದೆ. ಭ್ರಷ್ಟಾಚಾರ ನಡೆಸಿದವರೆಲ್ಲರೂ ಸ್ವಿಸ್ ಬ್ಯಾಂಕಿನಲ್ಲಿ ಹಣವಿಡಲು ಸಾಧ್ಯವಿಲ್ಲವಲ್ಲ? ಎಷ್ಟು ಹಣ ವಿದೇಶಿ ಬ್ಯಾಂಕುಗಳಲ್ಲಿದೆ ಎಂಬುದೂ ಸರಿಯಾಗಿ ತಿಳಿಯದ ಗುಪ್ತ್ ಗುಪ್ತ್ ವ್ಯವಹಾರದ ಬಗ್ಗೆ ರೋಷಾವೇಷದಿಂದ ಮಾತನಾಡುವವರೆಲ್ಲರೂ ದೇಶೀಯ ಕಪ್ಪು ಹಣದ ಬಗ್ಗೆ ವಿಚಿತ್ರ ಮೌನ ತಾಳುವುದೇಕೆ? ‘ವೈಯಕ್ತಿಕವಾಗಿ ಭ್ರಷ್ಟಾಚಾರ ತಪ್ಪಲ್ಲ, ರಾಜಕೀಯ ನೇತಾರ, ದೊಡ್ಡ ದೊಡ್ಡ ಉದ್ದಿಮೆದಾರ ಭ್ರಷ್ಟಾಚಾರ ಮಾಡಿ ಸ್ವಿಸ್ ಬ್ಯಾಂಕಿನಲ್ಲಿ ಹಣವಿಡುವುದು ತಪ್ಪು’ ಎಂಬ ಅಭಿಪ್ರಾಯ ಈ ಮೌನಕ್ಕೆ ಕಾರಣ. ‘ಅವರು ಗೌರ್ನಮೆಂಟಿನಲ್ಲಿದ್ದಾಗ ಚೆನ್ನಾಗಿ ದುಡ್ಕೊಂಡ್ರು, ಒಳ್ಳೇ ಮನೆ ಕಟ್ಸಿದ್ದಾರೆ. ಎರಡು ಮೂರು ಸೈಟು ಮಾಡಿದ್ದಾರೆ’ ಎಂದು ಸುತ್ತಲಿನವರನ್ನು ಹೊಗಳುವವರಿಲ್ಲವೇ? ಖಾಸಗಿಯಾಗಿ ಸೈಟು ಮಾರುವವರು ಕೊಳ್ಳುವವರಲ್ಲಿ (ಅದರಲ್ಲೂ ನಗರಗಳಲ್ಲಿ) ಎಷ್ಟು ಮಂದಿ ಕೊಟ್ಟ ಅಥವಾ ಪಡೆದ ದುಡ್ಡಿನಷ್ಟೇ ಮೌಲ್ಯಕ್ಕೆ ರಿಜಿಷ್ಟ್ರೇಶನ್ ಮಾಡಿಸುತ್ತಾರೆ? ಅಲ್ಲಿ ಹರಿದಾಡುವ ಮೊತ್ತವೂ ಕಪ್ಪು ಹಣವಲ್ಲವೇ? ಉದಾಹರಣೆಗಳನ್ನು ನೋಡಿದರೆ ದೇಶದಲ್ಲಿ ಚಲಾವಣೆಯಲ್ಲಿರುವ ಕಪ್ಪುಹಣವನ್ನು ಕಂಡುಹಿಡಿದರೆ ಸಾಕು ಭಾರತ ಖಜಾನೆಗೆ ಎಷ್ಟೋ ಸಾವಿರ ಕೋಟಿ ಭರ್ತಿಯಾಗುತ್ತದೆ. ಆದರೇನು ಮಾಡೋದು ವಿದೇಶದ ಕಪ್ಪು ಹಣಕ್ಕಿರುವ ಗ್ಲ್ಯಾಮರ್ ಭಾರತದ ಕಪ್ಪು ಹಣಕ್ಕಿಲ್ಲವಲ್ಲ! ತನಿಖೆ ನಿಧಾನಗತಿಯಲ್ಲಿ ಸಾಗಿ, ಭಾರತದ ಇತರ ತನಿಖೆಗಳಂತೆ ಸಾಗಿದರೆ ಅನುಮಾನವೇ ಬೇಡ ಇನ್ನೊಂದಷ್ಟು ವರುಷ ನಮ್ಮ ರಾಜಕೀಯ ಪಕ್ಷಗಳು ಕಪ್ಪು ಹಣದ ಭೂತವನ್ನು ಮತದಾರನ ಹೆಗಲಿಗೇರಿಸುತ್ತಾ ಗೆಲುವು ಸಾಧಿಸುತ್ತಾರೆ.

No comments:

Post a Comment

ನಮ್ಮ ಪ್ರಶಸ್ತಿ ಪುರಸ್ಕೃತರು..

ದಣಿವರಿಯದ ಸಮಾಜಮುಖಿ - ಕೆ. ನೀಲಾ ೧-೮-೬೬ರಂದು ಬೀದರ ಜಿಲ್ಲೆ ಬಸವಕಲ್ಯಾಣದಲ್ಲಿ ಹುಟ್ಟಿದ ಕೆ. ನೀಲಾ ಕರ್ನಾಟಕದ ಜನಪರ ಹೋರಾಟಗಳಲ್ಲಿ, ಮಹಿಳಾ ಹೋರಾಟಗಳಲ್ಲಿ ಮ...