Wednesday, September 16, 2015

ಕನ್ನಡ ನಮ್ಮ ಭಾಷೆಯಲ್ಲ ಬದುಕಾಗಲಿ





ರವಿ ಮೆತ್ರಿ, ಮುಧೋಳ್

ಶಿಕ್ಷಣದ ಖಾಸಗೀಕರಣ ಮತ್ತು ಭಾಷಾನೀತಿಯ ಮೂಲಉದ್ದೇಶವೇ ಕನ್ನಡದ ಮೇಲೆ ಪ್ರಭುತ್ವ ಸಾಧಿಸುವುದಾಗಿದೆ. ಆದ್ದರಿಂದ ನಮ್ಮ ಭಾಷೆಯೇ ನಮ್ಮ ಬದುಕಾಗಲಿ ಮತ್ತು ಪ್ರಭುತ್ವವಾಗಲಿ. ನಮ್ಮ ಕನ್ನಡ ಭಾಷೆಯು ಕೇವಲ ಸಂವಹನ ಮಾಧ್ಯಮವಲ್ಲ, ಅದು ನಮ್ಮ ಸಂಸ್ಕೃತಿಯ ವಾಹಕ ಶಕ್ತಿಯಾಗಿದೆ. ಕನ್ನಡ ನಮ್ಮ ಬದುಕಿನೊಂದಿಗೆ ಬೆರೆತು ಹೋಗಿದೆ. ಅದರಿಂದ ನಮ್ಮ ಬದುಕನ್ನು ಭದ್ರಗೊಳಿಸಿದೆ. ಒಂದು ಸಮುದಾಯದ ಬದ್ಧತೆಯನ್ನು ಬಯಸಿ ಜೀವಂತಿಕೆಯನ್ನು ಸಾರುವುದೇ ಭಾಷೆಯ ಮೂಲ ಉದ್ದೇಶವಾಗಿದೆ.


 ಕನ್ನಡಿಗರು ತಮ್ಮ ಉಳಿವಿಗಾಗಿ ಬೀದಿಹೋರಾಟಗಳ ಮೂಲಕ ಮತ್ತು ಸಂಸ್ಕೃತದ ಜಡ ವೌಲ್ಯದ ವಿರುದ್ಧ ವೌನದ ಧಿಕ್ಕಾರ ಕೂಗುತ್ತಾ ಬಂದಿದ್ದಾರೆ. ಈ ನೆಲದ ಜನರ ಧ್ವನಿಯು ಎಲ್ಲೆಡೆಯೂ ಪಸರಿಸಬೇಕಿದೆ. ನಮ್ಮ ಎಲ್ಲ ಧಾರ್ಮಿಕ ಆಚರಣೆಗಳು ನಮ್ಮ ತಾಯಿಯ ಭಾಷೆಯ ಮೂಲಕ ನಡೆಯಬೇಕು. ಕೇವಲ ಧಾರ್ಮಿಕತೆ ಮಾತ್ರವಲ್ಲದೆ, ನಮ್ಮ ನಾಡಿನ ಸಕಲ ರಂಗಗಳು ಅಂದರೆ ಸಿನೆಮಾ, ಸಾಹಿತ್ಯ, ಉದ್ಯೋಗ ಮತ್ತು ತಾಂತ್ರಿಕತೆ ಸಮೀಕರಣದ ಮೂಲಕವೇ ನಡೆಯಬೇಕು.

ನಮ್ಮ ಭಾಷೆಯ ಉಳಿವಿಗಾಗಿ ನಡೆದ ಹೋರಾಟದ ಹಾದಿ ಬಹು ವಿಸ್ತಾರವಾಗಿದೆ. ಆ ಮೂಲಕವೇ ಅದು ತನ್ನ ಸ್ಥಾನವನ್ನು ಉಳಿಸಿಕೊಂಡಿದೆ. ಇದಕ್ಕೆ ಗೋಕಾಕ್ ಚಳವಳಿಯೇ ಉತ್ತಮ ಉದಾಹರಣೆಯಾಗಿದೆ. ನಮ್ಮ ನಾಡಿನಲ್ಲಿರುವ ಜಡವೌಲ್ಯದ ಭಾಷೆಯಾದ ಸಂಸ್ಕೃತವನ್ನು ಪ್ರಥಮ ಭಾಷಾ ಸ್ಥಾನಮಾನದಿಂದ ಕೆಳಗೆ ಇಳಿಸಲು ಹೋರಾಟ ಮಾಡಿ ಯಶಸ್ವಿಯಾದರು. ಅದರಂತೆ ಕನ್ನಡದ ಉಳಿವಿಗಾಗಿ 1979ರಲ್ಲಿ ಕರ್ನಾಟಕದಲ್ಲಿ ಕನ್ನಡ ಚಲನಚಿತ್ರ ಪ್ರದರ್ಶನ ಕಡ್ಡಾಯ ಆದೇಶವನ್ನು ಜಾರಿಗೊಳಿಸುವಲ್ಲಿ ಯಶಸ್ವಿಯಾದರು. 1988ರಲ್ಲಿ ಕನ್ನಡ ದೂರದರ್ಶನ ಕೇಂದ್ರವನ್ನು ಆರಂಭಿಸಿದರು. ಮುಂದೆ 1991ರಲ್ಲಿ ಹಂಪಿ ವಿವಿ ಸ್ಥಾಪಿಸಿದರು. 1992 ಕನ್ನಡ ಅಭಿವೃದ್ಧಿ ಪ್ರಾಧಿಕಾರ ಸ್ಥಾಪಿಸಿದರು.


ಇಷ್ಟೆಲ್ಲಾ ಸಾಧನೆಯ ಹಾದಿಯಲ್ಲಿ ಕನ್ನಡ ಸಾಗಿದರೂ ನಮ್ಮ ಬದುಕಿನ ಭಾಷೆಯಾಗುವಲ್ಲಿ ವಿಫಲವಾಗಿದೆ. ಅದು ಹೇಗೆ ಎಂದರೆ ಕನ್ನಡ ನಮ್ಮ ನಾಡಿನ ಪಠ್ಯದ ಪ್ರಥಮ ಭಾಷೆಯಾಗಿಲ್ಲ. 1994ರಲ್ಲಿ ಸುಪ್ರೀಂ ಕೋರ್ಟ್ ಕನ್ನಡವೇ ಕರ್ನಾಟಕದ ಮಾತೃಭಾಷೆ ಎಂದು ತೀರ್ಪು ನೀಡಿತ್ತು. ಆದರೆ ಇಂದು ನಮ್ಮ ನಾಡಿನಲ್ಲಿ ಯಾವುದೇ ಭಾಷೆಯನ್ನು ಪ್ರಥಮ ಭಾಷೆಯಾಗಿ ಕಲಿಯಬಹುದಾಗಿದೆ. ಈ ಕಾರಣಕ್ಕೆ ನಮ್ಮ ಭಾಷೆಯ ಸ್ಥಾನ ಕಡಿಮೆಯಾಗಿದೆ ಎಂದು ಭಾವಿಸುವುದು ಶತಮೂರ್ಖತನವಾಗುತ್ತದೆ. ನಾವು ಆಧುನೀಕರಣದ ಭರಾಟೆಯಲ್ಲಿ ನಮ್ಮ ತನವನ್ನೇ ಕಳೆದುಕೊಳ್ಳುತ್ತಿದ್ದೇವೆ. ಜಾಗತೀಕರಣ ಎಂಬ ಮಹಾ ಅಲೆಗೆ ಸಿಲುಕಿದ್ದೇವೆ.

ಮೂಲವೇ ಇಲ್ಲದ ಇಂಗ್ಲಿಷ್ ಭಾಷೆಯ ಬೆನ್ನು ಹತ್ತಿದ್ದೇವೆ. ಲಿಪಿಯೇ ಇಲ್ಲದ ಹಿಂದಿ ಭಾಷೆಗಿಂತ ಹಿಂದುಳಿದಿದ್ದೇವೆ ಎಂದು ಭಾವಿಸಿದ್ದೇವೆ. ನಮ್ಮ ಹೆತ್ತೊಡಲಿಗೆ ಬೆಂಕಿಯಿಡುವ ಕಾರ್ಯ ಮಾಡುತ್ತಿದ್ದೇವೆ. ನಮ್ಮಲ್ಲಿನ ಕೀಳರಿಮೆಯು ನಮಗೆ ನಮ್ಮ ಭಾಷೆಯನ್ನು ಕೀಳಾಗಿ ಕಾಣುವಂತೆ ಮಾಡಿದೆ. ಭಾರತದ 22 ಭಾಷೆಗಳಲ್ಲಿ ಕನ್ನಡ ಭಾಷೆಯು ತುಂಬಾ ಪ್ರಾಚೀನವಾದದು, ವಿಶ್ವದಲ್ಲಿ ಸುಮಾರು 4,000 ಭಾಷೆಗಳಿವೆ. ಅದರಲ್ಲಿ ಕನ್ನಡವು ಒಂದಾಗಿದೆ. ಕನ್ನಡದ ಭಾಷೆ 30ನೆ ಸ್ಥಾನ ಪಡೆದು ವಿಶ್ವಮಟ್ಟದಲ್ಲಿ ಭದ್ರವಾಗಿದೆ. ಅದನ್ನು ಈ ಮುಂದಿನಂತೆ ಅರಿಯಬಹುದು. ಕನ್ನಡವು ಶಾಸ್ತ್ರೀಯ ಸ್ಥಾನಮಾನ ಪಡೆದಿದೆ. ಪ್ರಾಚೀನತೆಯಲ್ಲಿ 9ನೆ ಸ್ಥಾನ ಪಡೆದಿದೆ. ಲಿಪಿಗೆ ಪ್ರಥಮ ಸ್ಥಾನವಿದೆ. ಪ್ರತಿವರ್ಷ 7000ಕ್ಕೂ ಅಧಿಕ ಪುಸ್ತಕಗಳು ಬಿಡುಗಡೆಯಾಗುತ್ತವೆ. 100ಕ್ಕೂ ಅಧಿಕ ವೆಬ್‌ಸೈಟ್‌ಗಳಿವೆ ಮತ್ತು ಯೂನಿಕೋಡ್‌ನಲ್ಲಿ 16ನೆ ಸ್ಥಾನ ಪಡೆದಿದೆ. ಇಷ್ಟೆಲ್ಲಾ ಪ್ರಾಮುಖ್ಯತೆ ಪಡೆದ ನಮ್ಮ ಭಾಷೆಯು ನಮ್ಮ ಕಲಿಕೆಯ ಪ್ರಥಮ ಭಾಷೆಯಾಗುವಲ್ಲಿ ವಿಫಲವಾಗಲು ಕಾರಣವೇ ಇದು ಪ್ರಭುತ್ವದ ಭಾಷೆಯಾಗದೆ ಇರುವುದು. ಇದನ್ನು ಅಧ್ಯಯನ ಮಾಡಿದವರಿಗೆ ಉದ್ಯೋಗ ದೊರೆಯದೇ ಇರುವುದು ಇದರ ವಿಫಲತೆಗೆ ಕಾರಣವಾಗಿದೆ.

ಶಿಕ್ಷಣದ ಖಾಸಗೀಕರಣ ಮತ್ತು ಭಾಷಾನೀತಿಯ ಮೂಲ ಉದ್ದೇಶವೇ ಕನ್ನಡದ ಮೇಲೆ ಪ್ರಭುತ್ವ ಸಾಧಿಸುವುದಾಗಿದೆ. ಆದ್ದರಿಂದ ನಮ್ಮ ಭಾಷೆಯೇ ನಮ್ಮ ಬದುಕಾಗಲಿ ಮತ್ತು ನಮ್ಮ ಪ್ರಭುತ್ವವಾಗಲಿ. ಕನ್ನಡ ಎಲೆಮರೆಯ ಕಾಯಿಯಂತೆ ಮರೆಯಾಗದಿರಲಿ. ಈ ನಾಡಿನ ಯುವಜನತೆ ನಮ್ಮ ಭಾಷೆಯನ್ನು ರಕ್ಷಿಸಲು ಮುಂದಾಗಲಿ.

1 comment:

ನಮ್ಮ ಪ್ರಶಸ್ತಿ ಪುರಸ್ಕೃತರು..

ದಣಿವರಿಯದ ಸಮಾಜಮುಖಿ - ಕೆ. ನೀಲಾ ೧-೮-೬೬ರಂದು ಬೀದರ ಜಿಲ್ಲೆ ಬಸವಕಲ್ಯಾಣದಲ್ಲಿ ಹುಟ್ಟಿದ ಕೆ. ನೀಲಾ ಕರ್ನಾಟಕದ ಜನಪರ ಹೋರಾಟಗಳಲ್ಲಿ, ಮಹಿಳಾ ಹೋರಾಟಗಳಲ್ಲಿ ಮ...