Saturday, November 14, 2015

ಸರಸ್ವತಿ ದು ಎರಡು ಕವಿತೆಗಳು



೧ 

ನಡುವಿನಂತರ ಒಂದಡಿ


ಬಸಿವ ನೆತ್ತರು
ಸುರಿವ ಹಾಲು
ನಡುವಿನಂತರ ಒಂದಡಿ ಕಂಡು
ಬೆಚ್ಚಿದರು
ಹುಚ್ಚತ್ತಿಸಿಕೊಂಡರು
ಕಿಚ್ಚತ್ತಿಸಿಕೊಂಡರು
ನಾಚಿದರು
ಸ್ವತ್ತೆಂದು ಬೇಲಿಯಾದರು
ಸಂಪತ್ತೆಂದು ಕಾವಲು ಕಾದರು
ತಿಳಿಯದೆ ತರಾವರಿ ಹೆಸರಿಕ್ಕಿದರು

ತೊಡೆಸಂದಿನ ಮೂರುಕೋನವು
ನುಂಗಿಕೊಂಡ ಆಕ್ರಮಣವ
ಹಿಡಿದಿಟ್ಟ ಹಿಡಿಚೀಲ
ಎಡಬಿಡದೆ ಮುರಿಮುರಿದು
ಜೀವಕಣವಾಗಿಸಿ
ಉಸಿರ ಹೂವಾಗಿಸಿತು
ಅಂಗಾಂಗದಂಗುಲಂಗುಲವು ಸಿದ್ಧವಾಗಿ
ಹಾಲುನೆತ್ತರಾದವು ಉಸಿರ ಹೂವಿಗೆ

ಹಾಲುನೆತ್ತರೆರಡರೊಳಗರಿವುದೊಂದೇ ಜೀವಜಲ
ಅದಕ್ಕಿಲ್ಲ ಬಣ್ಣವೆಂದರಿಯದೆ
ಬಣ್ಣಕ್ಕೆ ಅಂಜಿದ
ಚಿತ್ತಗಳಲ್ಲೋಲಕಲ್ಲೋಲವಾದವು
ಕಣ್ಣುಗಳು ಪೊರೆಗಟ್ಟಿದವು
***


೨ 
ಕಿತ್ತು ಬಿಸಾಡಿರುತ್ತಿದ್ದೆ ಎಂದೋ


ಕಿತ್ತು ಬಿಸಾಡಿರುತ್ತಿದ್ದೆ ಎಂದೊ
ಮೊಲೆಯೋನಿತೊಗಲಮೆತ್ತೆಗಳ

ಕಟ್ಟಿದ್ದ ನೆತ್ತರಮೆತ್ತೆ ಕಿತ್ತು ಬರುವ
ಜೀವ ಹೊತ್ತ ಸತ್ತೆ ಬರುವ
ಸ್ಖಲನ ಹರಿಬಿಟ್ಟ
ಮಿಲಿಯಾಂತರ ಜೊಳ್ಳು ಬಿತ್ತಗಳು
ಹೊತ್ತು ತರುವ ಏಕೈಕ ಬಸುರಿ ಬಿತ್ತ ಬರುವ
ನರನಾಡಿಗಳೆಲ್ಲೆಡೆ ಅಡಗಿರುವ
ನವಿರುಗಳು ಮೆಲುಕಂಪನದ ಬಿಂದುವಾಗುವ
ದಾರಿಯಾಗಿರದ್ದಿದ್ದರೆ

ಕಣಕಣಗಳ ಕಿಣಿಕಿಣಿಸುವ
ಪುಳಕಗಳಿಗೆ ನಿಮಿರಿ ನಿಲ್ಲುವ ಕಣಕಗಳು
ಹಸಿ ಕೂಸಿನ ಹಸಿವು ನೀಗಿಸಿ
ಕಸುವಾಗಿಸುವ
ಹಾಲಬುಗ್ಗೆಗಳಾಗಿರದಿದ್ದರೆ

ತೊಗಲ ದೇಗುಲದ
ಒಳಗಿನ ಮೂಲ ಬೆಳಕಿನ ಸೆಲೆಗೆ
ಆಗಿರದಿದ್ದರೆ ನೆಲೆ

    ನಿನ್ನ ಉದ್ರೇಕವನು
    ಏರಿಸಿ ಇಳಿಸುವ
    ಮೊಲೆಯೋನಿತೊಗಲಮೆತ್ತೆಗಳ
    ಎಂದೋ ಕೆತ್ತಿ ಬಿಸಾಡಿರುತ್ತಿದ್ದೆ
    ಇತ್ತೆಂಬ ಗುರುತಿಲ್ಲದಂತೆ
***


ಸರಸ್ವತಿ ದು. (೧೯೬೩) ಬೆಂಗಳೂರಿನವರು. ಹಲವಾರು ವರ್ಷಗಳಿಂದ ಮಹಿಳಾ ಸಂಘಟನೆ, ಗುತ್ತಿಗೆ ಪೌರ ಕಾರ್ಮಿಕ ಬೆಂಬಲ ಗುಂಪು, ಗಾರ್ಮೆಂಟ್ಸ್ ಕೆಲಸಗಾರರ ಸಂಘಟನೆ ಅಲ್ಲದೆ ಹಲವು ಅಸಂಘಟಿತ ಕಾರ್ಮಿಕ ಸಂಘಟನೆಗಳೊಡನೆ ಕೆಲಸ ಮಾಡುತ್ತಿರುವವರು. ‘ಮಾನಸ ತಿಂಗಳ ಪತ್ರಿಕೆ’ಯ ಸಂಪಾದಕ ಬಳಗದಲ್ಲಿದ್ದು ಕೆಲಸ ಮಾಡಿರುವ ಸರಸ್ವತಿ ಉತ್ತಮ ರಂಗ ಕಲಾವಿದೆ. ಸಾಹಿತ್ಯದಲ್ಲೂ ಸೂಕ್ಷ್ಮ ಅಭಿವ್ಯಕ್ತಿ ಹೊಂದಿದ್ದಾರೆ. ಇದುವರೆಗೆ ‘ಹೆಣೆದರೆ ಜೇಡನಂತೆ’, ‘ಜೀವ ಸಂಪಿಗೆ’ ಎಂಬ ಎರಡು ಕವನ ಸಂಕಲನಗಳು, ‘ಈಗೇನ್ಮಾಡೀರಿ’ ಎಂಬ ಅನುಭವ ಕಥನ, ಎ. ರೇವತಿಯವರ ಹಿಜ್ರಾ ಒಬ್ಬಳ ಆತ್ಮಕಥನ ಪುಸ್ತಕವನ್ನು ‘ಬದುಕು-ಬಯಲು’ ಎಂದು ಕನ್ನಡಕ್ಕೆ ಅನುವಾದಿಸಿದ್ದಾರೆ. ಅದು ಯಶಸ್ವಿಯಾಗಿ ರಂಗ ಪ್ರಯೋಗವನ್ನೂ ಕಂಡಿದೆ. ‘ನೀರದಾರಿ’ ಎಂಬ ದಲಿತ ಮಹಿಳಾ ಪ್ರಜ್ಞೆ ಕುರಿತ ಪುಸ್ತಕ ಸಂಪಾದಿಸಿರುವ ಸರಸ್ವತಿ ಹಲವು ಪ್ರಶಸ್ತಿ, ಸಮ್ಮಾನ ಪಡೆದಿದ್ದಾರೆ. ಪ್ರಸ್ತುತ ಬಿಜಾಪುರದ ಕರ್ನಾಟಕ ರಾಜ್ಯ ಮಹಿಳಾ ವಿಶ್ವವಿದ್ಯಾಲಯದಲ್ಲಿ ಸಂಶೋಧನಾ ನಿರತರಾಗಿದ್ದಾರೆ.

ವಿಳಾಸ: ಎಂ ಫ್ಲಾಟ್ ನಂ, ೦೦೬, ಶಾಂತಿ ನಿವಾಸ್, ತುಮಕೂರ್ ರೋಡ್, ಯಶವಂತಪುರ, ಬೆಂಗಳೂರು - ೫೬೦೦೨೨.
koliunja@gmail.com

1 comment:

ಮೇ 6,7 ಧಾರವಾಡ : 4ನೇ ಮೇ ಸಾಹಿತ್ಯ ಮೇಳ

ಇದು 2017 ರ ಮೇ ಸಾಹಿತ್ಯ ಮೇಳ.. ಎಲ್ಲ ಕಾಲದಲ್ಲೂ ವಿರೋಧ ಪಕ್ಷವಾಗಿಯೇ ಕಾಣುವ ಸಾಹಿತಿಗಳು ಕಲಾವಿದರು ಈ ಕಾಲದಲ್ಲಿ ಫ್ಯಾಸಿಸಂ ವಿರುದ್ಧ ಜನಪರ ಸಂಘಟನೆಗಳ ಜೊತೆ ಸೇರಿ ನ...