Sunday, November 29, 2015

ಲಾವಣ್ಯ ಪ್ರಭಾ ಕೆ. ಎನ್.ಎರಡು ಕವಿತೆಗಳು





೧ 

ಉಸಿರಿಂದ ಉಸಿರಿಗೆ



ಎಚ್ಚರವಾದಾಗ ಜೋರಾಗಿ ಕೇಳಿದ್ದು ಚೀರಾಟದ ಶಬ್ದ
ಈ ಅಳುವೇ ಸುತ್ತಲಿದ್ದವರ ಹರ್ಷಕ್ಕೆ
ಕಾರಣವಾಗಿತ್ತಂತೆ.
ಉಸಿರಾಟ ಶುರುವಾಗಿ ಒಳಗೆ ಹೊರಗೆ ಓಡಾಟ
ಪುಪ್ಪುಸಗಳ ಸಂಕುಚನ ವಿಕಸನಗಳಿಗೆ
ಪುಟ್ಟ ಫ್ರಾಕಿನ ನೆರಿಗೆಗಳ ಕುಣಿದಾಟ.
ನಿದ್ದೆ, ಕನಸು, ಎಚ್ಚರ ಎಲ್ಲದರೊಳಗೂ
ಉಸಿರಿನ ಸರಾಗ ರಾಗಮಾಲಿಕೆ
ಕೋಪದಲ್ಲಿ ಕೊಂಚ ತಾರಸ್ಥಾಯಿ
ಪ್ರೇಮದಲ್ಲಿ ಮಂದ್ರಸ್ಥಾಯಿ
ಅಕ್ಷತೆ ಮುಹೂರ್ತದ ಸಾಥ್‌ಗೆ
ಜೊತೆಗಾರನ ಎದೆಬಡಿತದ ಶಹನಾಯಿ.
ಗಾಳಿಬಲೂನಿನ ಬ್ರಹ್ಮಾಂಡದೊಳಗಿನ ಜೀವದ ಈಜು
ನೀರಿನೊಳಗಾಡಿದೆ ಮೀನು
ಬಾಗಿಲಿಲ್ಲದ ಮನೆ- ಹಾಗಾಗೇ
ಒಳಮನೆಯಿಂದ ಹೊರಮನೆಗೆ, ಮತ್ತೆ
ಹೊರಗಿಂದ ಒಳಗೆ ಸಲೀಸು ನಡೆದಾಟ.
ಕಾಲಲೀಲೆಗೆ ಶಿಥಿಲಗೊಂಡ ಪಂಜರ
ಮುರಿದು ಬಿದ್ದು ಹಕ್ಕಿ ಹಾರುವ ಹೊತ್ತು
ಮತ್ತೆ ನಿಶ್ಚಿತಗೊಳ್ಳುವ ಗೂಡು ಯಾರಿಗೆ ಗೊತ್ತು ?
ಬಯಲು ಆಲಯ ಎಲ್ಲವೂ ಒಂದೇ ಆಗುವ ಸಮಯ
ಎದೆಗೆ ಎದೆಯಾನಿಸಿ ಅವನಿಟ್ಟ ಪ್ರೇಮಶ್ವಾಸ
ವನ್ನು ಕೊನೇಬಾರಿಯೆಂಬಂತೆ ನಿಧಾ..... ನ
ಒಳಗೆ, ಒಳಗೆ ಎಳೆದುಕೊಳ್ಳುತ್ತಾ.... ಧ್ಯಾನ
ಒಳಗೆಳೆದುಕೊಂಡು ಹೊರಬಿಟ್ಟ ಕೊನೆಯುಸಿರು
ಮತ್ತೊಂದು ಹೊಸಜೀವ ಹೊಸದೇಹದೊಳಗಿನ
ಚೀರುವಿಕೆಯಲ್ಲಿ ಹೊಸ ಸೃಷ್ಟಿಯಲ್ಲಿ
ಹೊರಗಾಗುವ ಹೊತ್ತಿಗೆ....
ಅವನ ಹೂವು ಅವನದೇ ಮುಡಿಗೆ


೨ 

ಅಮ್ಮನಿಲ್ಲದ ಮಗು


ಅಮ್ಮನಿಲ್ಲದ ಮಗು...
ಮುಗಿಲುಗಳೇ ತೀಡಿ ಅವಳ
ಮುಂಗುರುಳ ನವಿರಾಗಿ
ಉಲ್ಲಸಿತಗೊಳ್ಳಿ
               
ಅಮ್ಮನಿಲ್ಲದ ಮಗು...
ಅಮ್ಮನಂಥ ಭೂಮಿಯೇ
ಮಲಗಿಸು ಮಡಿಲೊಡ್ಡಿ ಮೆಲ್ಲಗೆ
ಅಮ್ಮನೇ ಆಗು
               
ಅಮ್ಮನಿಲ್ಲದ ಮಗು...
ಹಕ್ಕಿಗಳೇ ಹೋಗಿ ಹಾರಿ
ಮಾತಾಡಿಸಿ ಅವಳ ಮುದ್ದುಮುದ್ದಾಗಿ
ಹಗುರಾಗಿ ನೀವೂ
               
ಅಮ್ಮನಿಲ್ಲದ ಮಗು...
ಗೊಂಚಲಲ್ಲಾಡುವ ಹೂಹಣ್ಣುಗಳೇ
ಅವಳ ತುಟಿಗೆ ನಿಮ್ಮನ್ನು ತಾಗಿಸಿಕೊಳ್ಳಿ
ಮತ್ತಷ್ಟು ಸಿಹಿಗೊಳ್ಳಿ

ಅಮ್ಮನಿಲ್ಲದ ಮಗು...
ಓ ದೇವರೇ ! ಪೊರೆ ನಿನ್ನ ಮಗುವನ್ನು
ಕೇವಲ ಕೇ... ವ... ಲ
ಮನುಷ್ಯ ಮಾತ್ರದವರಿಂದ
ಸಾರ್ಥಕವಾಗಲಿ ಹೆಸರು
ಅನಾಥನಾಥ ದೀನಬಂಧು
***

ಲಾವಣ್ಯ ಪ್ರಭಾ (೧೯೭೧) ಕನಕಪುರದಲ್ಲಿ ಹುಟ್ಟಿದವರು. ಕನ್ನಡ ಎಂಎ ಮಾಡಿ ಗೃಹಿಣಿಯಾಗಿರುವ ಅವರು ಮೈಸೂರಿನಲ್ಲಿದ್ದಾರೆ. ಹುಟ್ಟಲಿರುವ ನಾಳೆಗಾಗಿ, ಗೋಡೆ ಗಿಡ, ನದಿ ಧ್ಯಾನದಲ್ಲಿದೆ ಎಂಬ ಮೂರು ಕವನ ಸಂಕಲನ ಪ್ರಕಟಿಸಿದ್ದಾರೆ.

ವಿಳಾಸ: ೧೨, ೪ನೇ ಬ್ಲಾಕ್, ಎಸ್‌ಬಿಎಂ ಲೇಔಟ್, ಶ್ರೀರಾಂಪುರ ೨ನೇ ಹಂತ, ಮೈಸೂರು - ೫೭೦೦೨೩.

 lavanyakn12@gmail.com

No comments:

Post a Comment

ಮೇ 6,7 ಧಾರವಾಡ : 4ನೇ ಮೇ ಸಾಹಿತ್ಯ ಮೇಳ

ಇದು 2017 ರ ಮೇ ಸಾಹಿತ್ಯ ಮೇಳ.. ಎಲ್ಲ ಕಾಲದಲ್ಲೂ ವಿರೋಧ ಪಕ್ಷವಾಗಿಯೇ ಕಾಣುವ ಸಾಹಿತಿಗಳು ಕಲಾವಿದರು ಈ ಕಾಲದಲ್ಲಿ ಫ್ಯಾಸಿಸಂ ವಿರುದ್ಧ ಜನಪರ ಸಂಘಟನೆಗಳ ಜೊತೆ ಸೇರಿ ನ...