Wednesday, November 16, 2016

ಭಾರತೀ ದೇವಿ. ಪಿ : ಎರಡು ಕವಿತೆಗಳು




Image result for ಭಾರತೀ ದೇವಿ. ಪಿ


ಇಡಿಯ ಸೂತಕ

Image result for abstract art on peace


ಕಲಸು ಮೇಲೋಗರ
ಇಲ್ಲಿ ಪೂರ್ಣದಿಂದ ಪೂರ್ಣ ಕಳೆದು
ಪೂರ್ಣವೇ ಉಳಿಯುವುದಿಲ್ಲ
ಚೂರಾಗಿರುವುದು ಇಡಿಯಾಗಲು ಹಂಬಲಿಸುತ್ತಾ
ಬಯಸಿ ಬಯಸಿ
ಕೊನೆಗೂ ಚೂರಾಗಿಯೇ ಉಳಿದು
ಚೂರುಗಳಲ್ಲೇ ನೂರನ್ನು ತೋರಿಸುತ್ತದೆ

ಒಂದೆತ್ತಿ ಒಂದಿಳಿಸಿ
ಬಾವುಟ ಹಾರಿಸಿ, ಬಲೂನು ಚುಚ್ಚುವ
ನಿಶಾನೆಗಳ ಬೀಸಾಟದಲ್ಲಿ
ಚಿಂದಿ ಚಿತ್ರಾನ್ನವಾಗುವ
ನೂರು ಬಟ್ಟೆಗಳು
ಅವುಗಳ ಮೇಲಿನ
ಅಳಿಸಲಾಗದ ಕಲೆಗಳು
ಒಂದಾಗದೆ ಎರಡಾಗುವಂತೆ ನೂರಾಗುವಂತೆ
ನೂಕುತ್ತವೆ

ಈ ಅಗಾಧ ಸಮುದ್ರದ ಅಸಂಖ್ಯ ಹನಿಗಳು
ಬಿಡಿ ಬಿಡಿ ಉಪ್ಪಿನ ಕಣಗಳಾಗಿ
ಪಾದದ ಅಡಿ ಚುರ್ರೆನ್ನಿಸಿ
ಎಬ್ಬಿಸುತ್ತವೆ
ಬೆರೆತು, ಕರಗಿ ಅಸಂಖ್ಯ
ರುಚಿಗಳಿಗಾಗಿ ಪೈಪೋಟಿ ನಡೆಸುತ್ತವೆ

ಇಡಿ ಇಡಿ ಎಂಬ
ಮಡಿಯ ಸೂತಕದಿಂದ
ಮೈಲಿಗೆಯಾಗಿರುವ ಬಟ್ಟೆಗಳು
ಎತ್ತಿ ಒಗೆಯುವ
ಒರಟು ಕೈಗಳಿಗಾಗಿ ಕಾಯುತ್ತಿವೆ.....
***


ಚಹರೆ

Image result for abstract art on peace


ಒಂದು ಸೋಲ ಮುಂದೆ
ಒಂದು ಗೆಲುವ ಹಿಂದೆ
ನೀರಗೆರೆಯ ಚಹರೆ ಬರೆದು
ಅವಕ್ಕೆ ಕೈ ಕಾಲು, ಕಣ್ಣು, ಮೂಗು ಕಿವಿಗಳಿಗಿಂತೆ ಹೆಚ್ಚಾಗಿ
ಮೊಲೆ, ತುರುಬು, ನಿತಂಬ, ಜಘನಗಳ
ಕುರುಹಂಟಿಸಿ
ಪಂಚೇಂದ್ರಿಯಗಳ ಬಿಕರಿಗಿಡಲಾಗಿದೆ

ಗೊಣಗಿದ್ದನ್ನೇ ಗೊಣಗಿ
ಒದರಿದ್ದನ್ನೇ ಒದರಿ
ಸೋತು ಸೊಪ್ಪಾದ ನಾಲಗೆಗಳು
ಹಿಂದೆ ನೆನದದ್ದನ್ನೇ ನೆನೆದು ನೆನೆದು
ಪಾಚಿ ಕಟ್ಟಿದ ದೇಹಗಳು
ಚರ‍್ಮ ಸುಡುವ ಅಂಜಿಕೆಯಲ್ಲಿ
ಸೂರ್ಯ ಶಾಖಕ್ಕೆ ಮೈಯೊಡ್ಡದಾಗಿವೆ

ದೇಹವನ್ನೇ ದೀವವಾಗಿಸಿ
ನಾಚ್ ನಡೆಸುತ್ತಿರುವ ಆತ್ಮಗಳು
ಕಳಚಿಕೊಳ್ಳದೇ ತೊಟ್ಟು ತೊಟ್ಟು
ಭಾರವಾಗಿ, ಆರ್ದ್ರವಾಗಿ
ನಿತ್ರಾಣವಾಗಿ ಧರೆಗುರುಳುತ್ತಿವೆಯೇ ಹೊರತು
ಜಿಗಿಯುವಷ್ಟು ನೆಗೆಯುವಷ್ಟು ಲಘುವಾಗದಾಗಿವೆ
***

No comments:

Post a Comment

ಮೇ 6,7 ಧಾರವಾಡ : 4ನೇ ಮೇ ಸಾಹಿತ್ಯ ಮೇಳ

ಇದು 2017 ರ ಮೇ ಸಾಹಿತ್ಯ ಮೇಳ.. ಎಲ್ಲ ಕಾಲದಲ್ಲೂ ವಿರೋಧ ಪಕ್ಷವಾಗಿಯೇ ಕಾಣುವ ಸಾಹಿತಿಗಳು ಕಲಾವಿದರು ಈ ಕಾಲದಲ್ಲಿ ಫ್ಯಾಸಿಸಂ ವಿರುದ್ಧ ಜನಪರ ಸಂಘಟನೆಗಳ ಜೊತೆ ಸೇರಿ ನ...